貸款新手必看
貸款新手必看注意事項
香港生活節奏急促，生活又多姿多彩，無足夠嘅金錢真係好難生存。
例如好多人都經常唔覺意用信用卡「洗大咗」、或者想買貴野又唔想做分期付款、甚至宜家更流行小型創業（開辦網店、代購等等）。以上種種情況都會需要一筆具流動性嘅現金支持，先可以順利達成。
如果問屋企人借錢，會好難開口；問朋友借，又未必借到咁多錢；做抵押資產、物品，又驚如果還唔起就咩都無晒；信用卡現金透支更加唔洗講，總利息一定多到嚇死你！
呢個時候，「私人貸款」就幫到你手。但如果未申請過私人貸款嘅你，千奇唔好以為求其上網搵間財務公司借錢就可以搞掂。以下我地會幫各位列出貸款時有啲咩事項需要注意：
私人貸款注意事項1：忽略條款及細則
最近有好多財務公司都會推出現金回贈等等嘅優惠去吸引客戶借錢。
例如佢廣告會寫著：「新客戶貸款即獎現金$3,500」。
睇落現金獎好似幾吸引，但其實只要你細看條款，就會發現要符合很多嘅要求後，先可以拎到個$3,500現金。呢D條件多數都好難符合，例如要貸款額達30萬元、貸款年利率（APR）接近法定上限的48%、還款期要5年或以上等等。如果間財務公司真係批咗呢D條件俾你，而你又簽咗，咁樣就會影響到你TU中嘅信貸報告，而且還款額又多，會好大壓力。所以申請私人貸款一定要注意所有條款細則，仲要揀一D隨時都可以喺申請途中取消貸款嘅財務公司（唔會收手續費或其他額外費用），咁樣就一定萬無一失。
私人貸款注意事項2：誤選了三、四線嘅財務公司
可能你會問：「三線、四線財務公司有咩問題？最多都係唔出名咋啵，可能利息仲平D tim啦！」
我可以答你：「少年你太年輕了。」
三線、四線財務公司除咗係唔出名之外，仲有另外一個意思，就係佢地嘅追數手法都極之恐怖，可謂無所不用其極！ 例如：
到欠債人屋企淋紅油／騷擾鄰居。（電視劇都經常上演呢D嘅情節）
每日打幾十個電話俾欠債人、佢嘅屋企人、朋友、公司同事等等。
寄好多恐嚇信
仲有好多好多。。。。
呢D追數手段暫時未有全面法律條例監管，而且班收數佬好有經驗，所以警察難以追查。 小編相信應該無人想試吓掛……所以各位貸款新手借錢時記得要小心揀財務公司，比較好邊間係值得信賴嘅財務公司，先好申請私人貸款啊！（至於遲還幾多日先追數，每間公司都唔同，我明白大家都未必會遲還款，但意外嘅野無人會知，有時總會唔小心遲咗一兩日，之後佢哋點追數，大家真係要小心！）
至於點樣介定間財務公司係唔係3、4線呢！？基本上有幾個共通點大家可以留意一下：
唔查閱你TU（環聯信貸）嘅信貸報告—TU（環聯信貸）信貸報告係反映你過去嘅借貸紀錄（例如貸款和信用卡卡數嘅借貸額、還款期、還款紀錄等等）。大部份財務公司嘅批核經理都會根據呢份TU（環聯信貸）信貸報告去決定貸款批核與否。如果佢唔check你TU都肯批嘅話，即係代表間公司會接納好差嘅債仔…
接受IVA（債務重組）、DRB（債務舒緩）、破產中嘅客戶嘅財務公司—呢類客戶9成都係負債過多＋無能力還款，可想而知接受佢哋貸款申請嘅公司係幾咁差。
喺審查過程中會問勁多你嘅個人資料，要你提供家人、親戚、朋友嘅姓名和電話，甚至地址。加加埋埋差唔多要俾成20幾個人嘅資料—問你平時通常去邊行街、邊到買野、食野等等。（呢類公司通常都係少客，怕你走數，所以先會要你提供多D資料，方便日後搵你追數。）
私人貸款注意事項3：無比較就申請
所謂「貨比三家」，買衫、買電子產品、食嘢都會咁，申請私人貸款當然都要比較邊間財務公司好！ 尤其市面有好多貸款公司，所提供嘅最高貸款額、貸款年利率、優惠、現金回贈、還款期都唔一樣，所以借錢前最好先比較唔同財務公司嘅私人貸款產品，同埋要留意：
建議最多同時間 只 申請3間財務公司！
建議最多同時間 只 申請3間財務公司！
建議最多同時間 只 申請3間財務公司！
好重要，所以要講3次！
唔係因為「貨比三家」先叫你哋只申請3間公司。係因為每申請一間財務公司嘅私人貸款，佢哋都會查閱你TU（環聯信貸）嘅信貸報告。（正如上面所講，唔check TU嘅財務公司就唔好申請啦）
而TU（環聯信貸）係會記錄你申請過幾多間財務公司，如果你短時間內一次過申請好多間財務公司嘅私人貸款（或者申請信用卡），TU會覺得你係突然需要一大筆資金，如果借到咁大筆私人貸款，還款能力亦都會成問題，你嘅信貸評級就會被降低。因為TU唔會理解你只係比較緊邊間財務公司好。所以同時申請3間財務公司嘅私人貸款就差唔多啦！
各位貸款新手一定要細心比較、注意清楚私人貸款產品主要嘅條款&細則先好申請，一定要諗清楚！
私人貸款注意事項4：一時衝動
小額借錢，不外乎幾種主要原因：有野想買但唔夠錢、想清卡數（因為卡數min pay利息好貴）、小額創業（如：開網店）、小型醫療嘅開支，又或者私人事應急。
不過千祈唔好因為一時衝動而向財務公司借錢，以下有幾方面可以俾大家參考，考慮借錢時要注意嘅事項：
- 供得起嗎？
如果你係因為買野買多咗，跟住向財務公司借錢。咁你就要問自己係咪確保日後唔會再『洗大咗』？
如果你一路keep住呢種洗錢習慣，借錢呢個舉動只會無限loop，到時每月還款就愈來愈多，收支不平衡，借到無財務公司、朋友可以借，到時收支唔平衡，嚴重嘅仲可能會破產……
- 真係需要呢筆資金？
有時做人好容易迷失，好多時都搞唔清咩係必需，咩係非必需。
如果係必需品，例如：洗衣機、雪櫃或微波爐等等，咁就一定要買。
如果係非必需品，例如係：買汽車、買波鞋、球衣、手袋或其他奢侈嘅物品。
所以大家要諗清楚係咪咁中意嗰樣野，仲要衡量自己負唔負擔得起。
- 借得多，利息會好貴，值嗎？
同上面第1、2點差唔多，不過呢到講緊係大額貸款，例如貸款$50萬、甚至$100萬以上等等。 呢種大額貸款嘅利息都誇張。借咁多錢通常都係投資房地產或生意上周轉，所以大家要諗真D係咪咁需要呢筆錢。因為利息通常都係10幾至20萬左右，甚至更多！（每間財務公司都不同利息）……
總結一下以上衝動借錢嘅影響：
借得多、不斷續借，就要俾好多利息，影響日後嘅收支平衡。
影響收支平衡後，會令你再借錢，不斷無限loop，最終只會令你走數／遲還，影響你TU紀錄（環聯信貸的信貸報告）
私人貸款注意事項5：文件唔齊
每間銀行、財務公司嘅貸款要求都唔一樣，所以要了解清楚申請文件等注意事項，先好申請貸款。 舉個例：如果有間財務公司要有商業登記證先可以獲得大額貸款批核，但你又無，咁就建議你唔好申請啦！因為當你揀咗唔適合嘅貸款公司，你就會再申請其他公司嘅私人貸款……正如上面都提及過，當你喺短時間內經多間財務公司／銀行申請貸款或信用卡，你嘅信貸報告就會受到影響。千祈唔好覺得小編囉嗦，因為真係好緊要，所以要提多幾次，希望各位貸款新手可以多多注意～
以下係多數公司要求嘅文件：
- 香港永久性居民身分證(附有3粒星) & 香港特區護照
雖然大部份人都滿足呢個條件，但如果你係內地新移民過來香港，又未居住夠7年，身份證就應該無3粒星；而如果你本身係外國人，就算喺香港住夠7年，但又未放棄原本國家嘅護照（即是未擁有香港特區護照），亦都好大機會不被銀行或財務公司接納申請。 順帶一提：呢到唔關種族歧視嘅問題，純粹係因為你未係香港永久性居民（未有3粒星/未有香港護照），你都有權隨時永久離開香港，心懷不軌嘅客戶就好容易走數，所以喺銀行、財務公司借錢多數有呢個條件都係合情合理。
- 郵寄的地址證明
呢樣野係非常之神奇，唔想要嗰陣，就成日收到；想要嗰陣，又突然間無公司寄過黎，或者等好耐先收到。平時我地都收到好多信，但多數人轉個頭就丟晒，到真正有需要嗰陣就一張地址證明都搵唔到！同樣道理，大部份銀行同財務公司都需要你提交一份郵寄嘅地址證明正本，如果唔交，佢地就會認為你係存在走數風險嘅機會！然後就唔會批你嘅貸款或信用卡申請！
私人貸款注意事項6：提供假資料
有好多人都以為虛構一張假嘅出糧紀錄，就可以瞞天過海，順利借錢；有啲人就扮人工高，然後會批多Ｄ貸款。其實所有銀行、財務公司嘅審批部都會好慬慎，一發現唔對路就會要求你留個公司電話、地址做備份。如果你真係無返工，到時你就會口啞啞，如果到最後都係決定唔俾，佢地多數會reject你嘅申請；如果你係盜取／冒認其他人嘅資料去借錢，銀行同財務公司一般都會保留報警追究嘅權利，所以大家千祈唔好因為一時周轉問題而去做D犯法嘢。
忠告：借錢梗要還，咪俾錢中介。
