4本存摺儲錢法 輕鬆儲錢冇難度！

香港地人工追唔上通漲，洗費又有增無減，衣食住行樣樣貴：家用、租金、管理費、水電煤、飯錢、車錢等… 每個月一大筆固定開支，儲錢儲錢，話儲就儲到咩。哩個時候，你需要「4本存摺儲錢大法」幫你輕鬆理財儲蓄。 

咩係4本存摺儲錢法？ 

哩個儲錢大法係由韓國理財專家高敬鎬所發明，佢指出：「收入就同水塔裡面嘅水一樣，雖然都係錢，但用途大為不同。如果能夠根據錢嘅用途分到唔同水管，即係用唔同存摺去管理，就會方便好多。」所以，要輕鬆儲錢就只需要4本存摺，打工仔都可以變成百萬富翁。 

開設4個户口 

踏出第一步，首先你要開設4個戶口：出糧戶口、消費戶口、投資戶口同備用戶口去管理唔同用途嘅錢。 

1. 出糧戶口 

用自動轉賬出糧嘅大部份打工仔要開哩個戶口話都冇咁易啦～但如果你係出現支票、現金或者打自己工(自僱人士)的話，就要自己先開一個出糧戶口。做法一樣，先將當月收入存入出糧戶口，扣除所有固定開支，然後將剩低嘅生活費轉賬到下一步嘅消費戶口，再將剩低嘅錢全部轉到投資戶口。 

2. 消費戶口 

消費戶口入面嘅資金，主要用喺支付飯錢、車錢、其他花費例如買衫、娛樂活動等。如果所有支出都能夠維持差唔多嘅水平，咁對你嘅投資計劃同儲蓄備用現金有非常大嘅幫助。 其實現時有好多記錄日常花費嘅手機APP可以輕鬆方便咁幫你記錄低每日/月生活開支：先計一計當月嘅生活開支，訂下平均每個月所需嘅生活費，然後每個月從出糧戶口自動轉帳哩筆生活費到消費戶口，到咗下一個月如果哩個戶口有剩錢，就將筆錢全部轉到備用戶口。 注意！一定要控制自己每月嘅生活費係喺訂下嘅金額範圍內，唔好洗大咗或者先洗未來錢！ 

3. 投資戶口 

哩個年代靠銀行嗰雞碎咁多息真係唔係好掂，學識投資好重要，要以「錢揾錢」去增加財富。投資戶口入面嘅資金用於支付股票、債券等各種投資商品，剩低嘅錢全部轉到備用戶口。當備用戶口嘅金額扣除備用資金後仲剩低一筆錢，就可以再投資到定期存款或基金等。 

4. 備用戶口 

備用戶口內最好保持月平均支出3至6倍嘅金額，咁樣就算你突然冇收入或者有其他大額嘅突發支出，短期內都可以維持正常生活，唔會餓死。 

而喺投資之前要確保有足夠備用資金，如果抽起咗備用資金就要及時補充返。切記！投資一定要量力而為，盡量選擇增長平穩嘅投資產品，亦要多方面投資去分散風險。 

想成功儲錢，必須量入為出、訂立長遠嘅理財目標同好好管理投資回報。如果你係收入唔穩定嘅自僱人士或者「SLASH斜槓族」，咁就更加要有良好嘅理財儲蓄習慣。