消費陷阱 (一)：數字遊戲

當你以為自己係一個好識得理財嘅精明消費者，但可能你曾經都喺日常生活中不知不覺中過消費陷阱。嚟緊會同大家破解一啲常見嘅消費陷阱背後嘅原理同目的，教你做個真正精明嘅生活理財達人！ 

今次就先講吓商人最中意玩嘅「數字遊戲」。我哋每日都俾好多數字糖衣陷阱包圍住，佢哋會令你產生自己「賺到」或者「慳咗錢」嘅幻覺，但其實就會令你洗多咗預算，睇吓以下兩個情況你有冇中過招？ 

情況一：買多包平啲 

呢種陷阱超市就最中意用，當好識得「理財」嘅你入到超市，望住自己張shopping list，心諗淨係會買list上面嘅嘢同相應數量，再望吓超市啲貨架幾乎個個黃色「優惠」價錢牌都係咁寫：買一包實會相對貴啲；買多幾包，平均價就會平咗，有啲甚至仲寫埋可以幫你慳到幾多錢～哩一刻睇落去係咪覺得唔買多幾包對唔住自己？ 

但大家細心思考吓，假如一袋內含四包嘅公仔麵要$35，買兩袋合計$58，就咁睇你會慳咗$12，如果將果$12除以八包公仔麵，每包平均只慳咗$1.5，即係每包公仔麵打咗「89折」。但為咗買到一包「89折」嘅公仔麵，你就攞多咗比原先預算多近80%嘅錢 ($43) 出嚟。可能你會咁諗：「我今次買多咗，下次就唔洗買，總數嚟講都係慳到錢。」但你又係咪保證到，之後唔會洗返你今次慳到嘅錢呢？ 

情況二：買一送一 

另一種常見數字陷阱就係「買一送一」，商人會將原價拉高同時買一送一，等消費者誤以為好荀。相信大家都有見過一啲促銷活動，標價上面寫住「原價$99，現買一送一」，心諗：「即買即賺$99，點可以錯過機會？」但你又知唔知件貨品「真正嘅原價」係幾多？商人定嘅所謂「原價」其實冇任何參考意義，除非你長期關注同記住哩件貨嘅價格升跌，如果唔係，說穿了哩個「原價」就係商人亂定。而通常哩種促銷效果都係最好，因為消費者會直覺認為可以「即買即賺$99」。 

睇到哩到，你哋仲算唔算係識得理財？其實只要細心啲搞清楚哩啲數字遊戲，唔好衝動消費，就可以防止洗多咗預算同有效咁理財。大家要記住，所謂好嘅「理財」唔係短時間內慳到錢，而係指洗嘅錢同預算一樣或更少！而且理財係長遠嘅事，無論你係普通打工仔定係李嘉誠都需要好好學習理財之道！下次再同大家分享其他消費陷阱，密切留意喇～