消費陷阱(三):連環消費

除咗之前同大家講過嘅「數字遊戲」同「包裝花招」之外,同大家分享最後一種常見嘅消費陷阱 「連環消費」 

常見嘅招式有以下兩種 

送禮券 

「歡迎光臨,而家消費滿$1000$100 coupon呀~ 

如果你咁啱可以買到$1000嘢,又可以立即用到張coupon,咁就係全單打咗個九折。但係,大多數時間都冇「咁大隻蛤乸隨街跳」。睇吓張coupon後面雞乸咁大隻字寫住coupon要喺指定日期內 (通常個日期係好接近收到張劵嗰日),一次過消費滿某金額先可以使用。即係話,張coupon你唔可以即刻用,想用就要喺短期內再次消費,但通常短期內再次消費嘅嘢都係唔急用或者直頭冇需要用。簡單啲嚟講,哩張coupon就係利用你「唔用就嘥晒」嘅心理,引誘你再次消費嘅陷阱 

便利店印花 

另一種連環消費陷阱,就係便利店嘅印花換禮品活動。通常係消費滿$20送一個印花、$40送兩個如此類推,而儲夠指定印花就可以加錢換購或者免費送一款禮品。換言之,為咗儲夠印花,你每次喺便利店會買好多原本唔需要嘅商品。假設你儲夠20個印花,而其中12個係「夾硬」儲嘅,咁你就多咗好多不必要嘅支出。其實如果你真係好想要個禮品,不妨直接上網買,又慳時間又慳錢,重點係一定買到心水款式 

小編一共同大家分享咗三種陷阱,其實哩啲消費陷阱都係製造一種「慳錢」嘅幻覺,但實際上係令你「先洗未來錢」!如果大家「連中三元」,就要喺消費嗰時多加留意身邊嘅消費陷阱,根據自己本身預算同實際需求去買,咁先真正做到理性消費 

FPS icon